2026/2027 КҮЗ-ҚЫС МАУСЫМЫНЫҢ СӘН ТРЕНДТЕРІ
38-ші Central Asia Fashion Autumn-2026 халықаралық сән көрмесінде 2026/2027 Күз-Қыс маусымының негізгі трендтері таныстырылды. Осы маусымда қандай киімдер сәнде болатыны туралы қазақстандық танымал стилист, Концептуалды стилистер мектебінің және «Style Session» имидж-стилистер қауымдастығының негізін қалаушы Мади Бекдаир жан-жақты баяндады.
Маусымның негізгі макротрендтері – ұтымдылық, маусымға тәуелсіздік және мінсіз еместік.
Ұтымдылық
«Экономикалық тұрақсыздық жағдайында бұл тұтынушылық мінез-құлықтың басты белгілерінің біріне айналып отыр. Адамдар заттардың құндылығына жаңаша көзқараспен қарап, көзге түсуге ұмтылудан бас тартып жатыр. Бүгінде практикалық тиімділік пен ұтымдылық жоғары бағаланады. Психологиялық тұрғыдан бұл тренд адамның өз өмірі мен ресурстарын бақылау сезімін қайта қалпына келтіруге деген ұмтылысын көрсетеді. Саналы тұтыну енді мәжбүрлі шара емес, жаңа әлеуметтік норма мен кемелдіктің белгісіне айналуда».
Маусымға тәуелсіздік
«Қыстың жылырақ, жаздың салқындау болуы және ауа-райының барған сайын құбылмалы бола түсуі маусымдар арасындағы қалыптасқан шекараларды жойып келеді. Сондықтан адамдар «Күз-Қыс» және «Көктем-Жаз» топтамалары арасындағы қатаң бөліністен гөрі әмбебап әрі көп қатпарлы образдарды жиі таңдайды. Психологиялық тұрғыдан бұл тренд тұрақтылықтың орнын икемділік басқан әлемге адамның бейімделуге деген ұмтылысын көрсетеді».
Мінсіз еместік
«Бұл – жасанды интеллект алгоритмдері, смартфон сүзгілері мен толық бақылауға негізделген эстетика қалыптастырған мінсіз образдардан туындаған визуалды шаршауға берілген жауабымыз. Бүгінде фактура, мінсіз еместік және адамның қолтаңбасын аңғартатын белгілер – өңделмеген жиектер, көзге көрінетін тігістер, мыжылған маталар, стильдердің үйлесуі мен әдейі жасалған салғырттық барған сайын жоғары бағалануда. Мінсіз еместік сән-салтанаттың жаңа көрінісіне айналып отыр, өйткені ол еркіндікті білдіріп, адамға өз даралығын көрсетуге мүмкіндік береді».
Шашақ
«Көпшілік шашақтың әлі күнге дейін трендте екеніне таңғалып, оны әлдеқашан сәннен шыға бастауы керек деп ойлайды. Алайда шашақ фактура немесе сәндік элемент ретінде торкөз өрнегі секілді. Ол жоғалып кетпейді, тек түрленіп отырады. Бір маусымда ол шахмат тәрізді торкөз түрінде көрінсе, келесі маусымда – тартан, одан кейін – «қаз табаны» өрнегі болуы мүмкін. Шашақ та дәл солай: бүгін ол – ар-деко стилінде, ертең – кантри, одан кейін – бохо, кейін байкерлік былғары шашақ түрінде көрініс табады. Ол үнемі өзгеріп отырады, бірақ ешқашан жоғалмайды. Қарапайым адам осының бәрінен қалай жаңылмай жүре алады? Стилистерді бақылап, сән көрсетілімдерін көріп, көрмелерге келіп, қарап, талдап отыру керек».
Жануарлар өрнегі
«Қазіргі таңда сәннің даму қарқыны айтарлықтай баяулағанын түсіну керек. Бұрынғыдай трендтің кенеттен пайда болып, дәл солай тез жоғалып кетуі қазір болмайды. Мысалы, қабылан өрнегін алайық. Оны қанша рет уақытша тренд деді? Бірақ ол қазірдің өзінде базалық элементке айналды, тек өзгеріп отырады: бүгін – қабылан, ертең – сілеусін, одан кейін – ілбіс өрнегі. Айтпақшы, осының арқасында біз бұл трендті де сабырлы қабылдай бастадық. Ол енді тұрпайы емес, бейтарап көрінеді. Көптеген трендтерге де осы жағдай тән. Екі жыл бұрын сатып алынған киімдерді де жаңа үйлесімдер жасап, еш қиындықсыз киюге болады».
Қауырсындар
«Қазір қауырсындар өте көп қолданылып жүр. Бұл да кездейсоқ емес, өйткені қауырсын жеңілдікке деген ұмтылысты білдіреді. Бізге күнделікті өмір, саясат, экономика және түрлі оқиғалар үлкен салмақ түсіреді. Сондықтан адамдар көзге жеңілдік сыйлайтын, романтика мен эмоцияға толы образдарға ұмтылады. Бұл бейсаналы деңгейде қалыптасатын үрдіс. Бір маңызды жайт – бүгінде негізінен табиғи қауырсындар емес, олардың имитациялары, яғни тоқыма материалдары мен түрлі фактуралар қолданылады. Біз экология мәселесіне көбірек мән бере бастадық. Жалпы, қауырсын – жай ғана сәндік элемент емес, ол қоғамның әлемде болып жатқан өзгерістерге берген психологиялық жауабы».
Оюлы шілтер
«Гүлдер, иректер мен жапырақтар түрінде нәзік ойылған өрнектері бар мұндай шілтерді Верея немесе Вологда қалаларындағы ағаш терезе жақтауларынан көруге болатын еді. Алайда бүгінде ол Dolce & Gabbana мен Fendi көйлектерінде, Saint Laurent жакеттерінде және Simone Rocha қарындаш белдемшелерінде көрініс тапты».
Эклектика
«Адамдар сән көрсетілімдерін көріп, өздеріне түртіп алып жатады: «Тіпті спорттық киімдердің өзі шілтермен безендірілген», «Неліктен көйлектерді кроссовкамен киетін болды?», «Бір-біріне мүлде үйлеспейтіндей көрінетін дүниелерді неге қатар үйлестіреді?». Меніңше, эклектика бүгінде жай ғана тренд емес, жаңа дәуірдің философиясына айналды. Біз енді бір нәрсенің екіншісімен үйлесетін-үйлеспейтінін сұрамаймыз. Біз оларды жай ғана үйлестіреміз. Кез келген эклектика – бұл сіздің таңдауыңыз. Өзім де бұрынғыға қарағанда ең тосын үйлесімдерге әлдеқайда сабырлы қарайтын болдым. Енді ешкімге «бұлай жасауға болмайды» деп дәлелдегім келмейді. Ең бастысы – бәрі қызықсыз әрі көңілсіз болып кетпесін».
Киім пирсингі және ерекше аксессуарлар
«Қазір сәнде қарапайым, бірақ әсерлі стильдеу тәсілдері өте танымал: түйреуіштермен түрлендіру, ерекше түймелер, брошьтар. Мысалы, кез келген, тіпті қымбат емес шығыршық сырғаларды алып, оларды түйме ілгектеріне өткізіп қоюға болады. Бұл тосын әрі өте сәнді көрінеді. Брошьтарға келсек, мұның бәрі бұрыннан белгілі. Стильден аз да болса хабары бар кез келген адам бүгінде брошьты аяқ киімге, басқа, сөмкеге немесе жеңге тағуға болатынын біледі. Ол бұрынғыдай тек классикалық аксессуар емес, әмбебап сән құралына айналды. Енді келесі қадам – сырғалар. Шын мәнінде, бұл киімге арналған өзіндік пирсинг: біз үйреншікті аксессуарды өз мақсатына сай емес түрде қолданамыз. Оны түйме ілгектеріне өткіземіз, матаға, шұлыққа немесе қалтаға тағамыз да, ерекше әрі жанды акцент жасаймыз. Бұл – Бүлікші архетипі. «Не істегім келсе, соны істеймін!» Айналада тұрақсыздық күшейген сайын адам өз жүйесін, өз тәртібін қалыптастырғысы келеді, ал киім арқылы мұны өте жақсы көрсетуге болады. Бұл адамның жеке болмысымен тікелей байланысты, образ сіздің өзіңізді көрсетуі керек. Тіпті тотемдік жануарыңызды негізге алуға болады. Бірақ оны тура мағынасында емес, фактура, пішін және бөлшектер арқылы берілетін ассоциациялар ретінде қолданған жөн».
Қолтырауын өрнегі
«Осы маусымда қолтырауын терісі мен оған еліктейтін материалдар әрбір екінші дизайнердің таңдаулыларының қатарында».
Пижама стиліндегі киім – өмірдің түрлі жағдайларына арналған таңдау
«Бұл енді жай ғана тренд емес, пандемия кезеңінен қалыптасқан әдетке айналды. Біз жайлылыққа үйреніп қалдық және одан бас тартқымыз келмейді. Сондықтан жеңіл маталар мен еркін, сәнді силуэттер әлі де танымал. Қазіргі сәннің басты идеясы қандай? Әдемілеп айтсақ, бұл – неоренессансқа ұмтылыс, өзіңе, сезімдеріңе, эстетикаға және шығармашылыққа қайта оралу. Біз қайтадан түстермен, фактуралармен және эмоциялармен жұмыс істей бастадық. Ең бастысы – енді «бәрі сияқты» болудан бас тартып келеміз. Негізгі қағида – қызықсыз болмау, көптің бірі болып кетпеу. Өз қалаңыздағы он мың адам сияқты киінудің қажеті жоқ. Ата-анаңыз сізге қандай дарын мен табиғи қасиеттер дарытқанын еске түсіріп, сол ерекшеліктеріңізді нағыз өнер туындысына айналдырыңыз».
