Көктем-жаз 2025 маусымының сән трендтері

2025 жылдың көктемі мен жазы кезеңінде сәнді әрі ыңғайлы киіну үшін нені білу керек? Central Asia Fashion Spring-2025 халықаралық сән көрмесінде маусымның негізгі трендтері ұсынылды

Алайда тек трендтерге сүйену — бұл үлкен әрі қызықты жолдың бір ғана бөлігі. Халықаралық тәжірибесі бар имидж-стилист, Концептуалды стилистика мектебінің тренері және «Style Session» имидж-стилистер қауымдастығының негізін қалаушысы Мади Бекдаирдің пікірінше, қандай да бір трендтерге ермес бұрын алдымен өзіңізбен танысып, жеке даралығыңызды зерттеу маңызды: «Трендтер туралы оқып, оларды бірден «өзіңе киіп көру» — ең жақсы шешім емес. Бұл — «сұр массаға» айналудың тура жолы. Өкінішке қарай, халықтың 90%-дан астамы өзінің психотипін, архетипін, дене бітімі типін, бет пішінін, сырт келбетінің колоритін білмейді. Ал бұл – өте маңызды факторлар. Сондықтан ең алдымен: сен кімсің? — деген сұраққа жауап беру керек. Көбірек табыс тапқысы келетін кәсіби сарапшы ма? Жұбай және әке ме? Жұбай және ана ма? Тұрмысқа шыққысы келетін бойжеткен немесе шығармашылық мамандықтағы креативті ер адам ба? Әлде байсалды мемлекеттік қызметші ме? Осындай негізгі сұрақтарға жауап бере отырып, адамның келбеттік бейнесінің іргетасы қаланады».

Сән бағыттарына келетін болсақ, қазіргі таңда жайлылық пен іскерлілікке, утилитарлық модаға басымдық беру өзекті болып отыр. Адамдар жайлылықты қалайды, барлығына тәулігіне 25 сағат, аптасына 8 күн керек секілді. Алайда тек спорттық шик стиліне еліктеп, джинсы, ақ кроссовки мен оверсайз жакетті үнемі үйлестіре беру қажет емес. Бұл комбинация қазір барлығына ортақ, тым жиі қайталанатын құбылысқа айналуда. «Мысалы, көптеген интерьерлер мен жағдайларға тамаша үйлесетін бағыт — круиздік стиль. Бұл — қардай аппақ реңктердің көк, ашық қызыл түстермен және алтын түстес фурнитурамен үйлесімі. Мұндай фурнитура элементтері зәкір шынжырларын еске түсіретін тізбекті бөлшектер болғаны жөн. Айта кету керек, круиздік стиль — бұл міндетті түрде жолақ жейде кию деген сөз емес, одан көптеген әйелдер оттан қорыққандай қашады. Ең бастысы — дәл осы түстер палитрасы. Мұндай лук көптеген адамға жарасады, ол ыңғайлы және саяхат атмосферасын тудырады, яғни бізге артық жұмыс істемей, күйіп кетпеуге мүмкіндік беретіндей әсер қалдырады. Тағы бір маңызды жайт: круиздік демалыс тақырыбы көбіне luxury-сегментке жатады, сондықтан мұндай лукты таңдағанда, тіпті киім масс-маркеттен алынған болса да, сыртқы келбетіңіз визуалды тұрғыда қымбат көрінеді», – дейді Мади Бекдаир. Танымал қазақстандық стилист спорттық стильдерді тереңірек зерттеуді ұсынады — мысалы, сафари стилі қазіргі таңда ерлер мен әйелдер сәнінде де жетекші бағыттардың бірі: «Бұл стиль қалалық декорацияларда, кеңседе, әсіресе дресс-код жоқ жерлерде өте жақсы көрінеді. Ол — отарлаушылар мен саяхатшылар стилі, сондықтан ол өзін-өзі шабыттандыруға, шекараларды кеңейтуге ұмтылуға тамаша үйлеседі. Сонымен қатар, спорттық шикты әдейі көрсетуге болады. Спорттық дресс-кодтан бір элементті алып, оны базалық гардеробтағы заттармен үйлестіріңіз. Мен жақында Миланнан оралдым, сонда дизайнерлер подиумға модельдерді кешкі көйлектермен шығарып, үстіне бомбер, олимпиадалық күртеше, спорттық куртка немесе худи кигізіп жатқанын байқадым. Эклектикалық па? Әрине. Бәріне түсінікті ме? Ешқашан! Қызықты ма? Иә. Бірегей ме? Иә. Сізді көпшіліктің арасынан ерекшелей ме? Сөзсіз! Сондай-ақ трендте — бәріне бірдей жалықтырған күртешелердің орнына жылы әрі жеңіл ұшатын пончо, түрлі плащтар. Олар бізді әлемдік әдебиет пен кинематографиядағы сиқыршылардың бейнелеріне сілтейді. Бұл трендтің келуі заңды, өйткені бүгінде көптеген адам эзотерикаға қызығушылық танытуда, біз қуаттарға, ғарыш заңдарына, нәзік материяларға терең бойлап бара жатырмыз…».